Katibu Tawala Mkoa Wa Kilimanjaro Tixon Nzunda Afariki Dunia Kwa Ajali Ya Gari

Imetumwa: June 18th, 2024

Katibu Tawala wa Mkoa wa Kilimanjaro, Dkt. Tixon Nzunda, na dereva wake, wamefariki dunia kwa ajali ya gari iliyotokea leo mchana katika eneo la Mjohoroni-Palestina, Kata ya KIA, Wilaya ya Hai, mkoani hapa.

Dkt. Nzunda, alikuwa akielekea Uwanja wa Ndege wa Kimataifa wa Kilimanjaro (KIA), kwente mapokezi ya  Makamu wa Rais, Dk. Philip Mpango.

Marehemu Dk. Nzunda na dereva wake, walipoteza maisha leo alasiri, baada ya gari lake aina ya VXR, kugongana uso kwa uso na lori la kubeba nishati ya gesi safi, mali ya Kampuni ya Orange Gas, lenye namba za usajili T 655 ABY, aina ya Scania lililokuwa likitokea Arusha kwenda Moshi.

Mkuu wa Mkoa wa Kilimanjaro, Nurdin Babu, akitangaza taarifa za kifo cha Dk. Nzunda, amesema Katibu Tawala huyo na dereva wake walipoteza maisha, majira ya saa 8:30 mchana katika eneo la Mjohoroni (Palestina), Wilaya ya Hai.

"Alipofika kwenye eneo hili (Mjohoroni-Palestina), ambalo lori kama unaliona lilikuwa speed (kasi) na wao walokuwa speed, kwa hiyo wamegongana uso kwa uso na kusababisha kifo chake.

"Kwa hiyo napenda kuchukua nafasi hii kuwajulisha wananchi wa Mkoa wa Kilimanjaro, kwamba tumepata msiba mkubwa wa Katibu Tawala wetu wa Mkoa na nimeshamjilisha Mheshimiwa Waziri wetu wa TAMISEMI, ili mheshimiwa Waziri nae atawajulisha viongozi wetu wakuu wa nchi yetu."

Kamanda wa Polisi, Mkoa wa Kilimanjaro, Kamishna Mwandamizi Msaidizi (SACP), Simon Maigwa, amesema magari mawili  yaliyogongana na kusababisha vifo viwili ambaye ni RAS pamoja na dereva wake.

Kwa mujibu wa SACP- Maigwa, chanzo cha ajali hiyo kinachunguzwa.

Aidha, Mwenyekiti wa Chama cha Mapinduzi (CCM), Mkoa wa Kilimanjaro, Patrick Boisafi, amempa pole Mkuu wa Mkoa huo, kwa kuondokewa na mtumishi mwenzake ambaye aliaminiwa na Rais, Samia Suluhu Hassan ya kufanya kazi kama Katibu Tawala wa Mkoa.