Mkurugenzi Hai Awataka Watumishi Kuweka Malengo

Imetumwa: January 4th, 2021

Mkurugenzi Mtendaji wa Halmashauri ya Wilaya ya Hai Yohana Sintoo amewataka watumishi wa halmashauri hiyo kuweka malengo ya kuwaongoza kwenye mwaka unaoanza wa 2021.

Akitoa salamu za Mwaka Mpya kwa watumishi wa makao makuu ya halmashauri hiyo, Sintoo amesema ni utamaduni mzuri kwa watu kujiwekea malengo ya utekelezaji wa mipango ya kazi lakini pia waweke mipango ya namna ya kutekeleza mipango ya nyumbani.

Amewataka watumishi hao kuwa na utamaduni wa kujiwekea malengo na kwamba wajitahidi kuzingatia utekelezaji wake ikiwa ni njia moja ya uhakika kufikia mafanikio katika kazi zao lakini pia maendeleo ya familia zao.

Pamoja na salamu hizo; Sintoo ametumia kikao hicho kuwasisitizia watumishi wa umma kuhusu utekelezaji wa majukumu yao katika kuwahudumia wananchi wa Wilaya ya Hai kupitia Idara na Vitengo wanavyofanyia kazi.

“Serikali imetuleta hapa tuwahudumie wananchi na tunatakiwa kuwahudumia kwa nguvu zetu zote kuhakikisha wanaridhika na huduma zetu”

“Ikitokea tunakutana na mwananchi anazunguka kwenye maeneo ya ofisi; tuwasaidie kufika kwenye ofisi wanazohitaji kupata huduma” Ameongeza Sintoo.