Halmashauri Zapewa siku 30 Kukamisha Ujenzi Wa Madarasa

Imetumwa: November 16th, 2021

Waziri wa Nchi Ofisi ya Rais Tawala za Mikoa na Serikali za Mitaa Mhe. Ummy Mwalimu ameziagiza Halmashauri zote Nchini kuhakikisha zinakamilisha ujenzi wa Madarasa  ifikapo tarehe 15.12.2021

Waziri Ummy ametoa agizo hilo leo Nov 16 2021 alipofanya ziara ya kukagua miradi ya maendeleo inayotekelezwa na Halmashauri ya Wilaya ya Hai Mkoani Kilimanjaro ambapo amesema kuwa hakutakuwa na uchaguzi wa awamu pili  ya wanafunzi wa kidato cha kwanza  na kuziagiza Halmashauri zote kuhakikisha wanakamilisha  ujenzi wa madarasa kwa wakati ili wanafunzi wote wanaofaulu kujiunga na kidato cha kwanza waanze kusoma kwa wakati mmoja.

Amesema fedha za UVIKO  19 zimetolewa kwa lengo la  kuendeleza miradi ya maendeleo kwenye  sekta ya Afya, na Elimu hivyo Viongozi wa Mikoa yote nchini  wanawajibu  wa  kuhakikisha wanasimamia kikamilifu ukamilishaji wa ujenzi wa miradi kwa wakati.

Aidha Waziri Ummy ametoa maelekezo kwa Halmashauri zote kutumia mapaa yenye migongo miwili ili kupunguza gharama za ujenzi na kuwataka kutumia tarazo au sakafu za kawaida kwa kuwa vigae vinavyowekwa kwenye ujenzi wa madarasa vipo chini ya viwango.

Kwa upande wake Mwenyekiti wa Halmashauri ya Wilaya ya Hai Edmund Rutaraka amemshukuru Mhe. Rais Samia kwa jitihada zake za kuboresha miundombinu ya shule ambapo pia amemuomba Waziri  kuwapatia fedha kwa ajili ya ujenzi wa mabweni mawili na uzio katika shule ya Sekondari ya Hai.

Halmashauri ya Wilaya ya Hai imepata kiasi cha shilingi milioni   860 kwa ajili ya ujenzi wa vyumba 43 vya madarasa.