Mwenyekiti Wa Halmashauri Ya Wilaya Ya Hai Awataka Madiwani Kusimamia Miradi Ya Maendeleo

Imetumwa: July 29th, 2022

Madiwani Halmashauri ya Wilaya ya Hai mkoani Kilimanjaro wametakiwa kuisimamia miradi ya maendeleo  iliyopo  kwenye kata zao na kuhakikisha inamalizika kwa wakati na kwa ubora.

Hayo yamesemwa leo Julai 28, 2022 na mwenyekiti wa Halmashauri  ya wilaya ya Hai Edmund  Rutaraka  kwenye baraza la madiwani  lililofanyika katika ukumbi wa Halmashauri ya Wilaya hiyo.

Rutaraka amesema halmashauri hiyo imefanikiwa kukusanya asilimia 94  ya mapato kwa mwaka wa fedha 2021/2022 ikiwa ni ongezeko la asilimia 12 kwa mwaka  wa fedha uliopita ambapo waliweza kukusanya asilimia 82.

Akizungumza katika kikao hicho, Mbunge wa Jimbo la Hai Saashisha Mafuwe amewapongeza madiwani kwa utendaji wao wa kazi ikiwa ni pamoja na usimamizi wa miradi ya maendeleo.

Aidha mbunge huyo amemtaka Meneja wa Tanesco wilaya ya Hai kuhakikisha wanashirikiana kikamilifu na viongozi wa mradi wa maji  Bomang’ombe – Kikafu soka ili kuhakikisha  mradi huo unakamilika kwa wakati.