Wananchi Wa Kata Ya Weruweru Waiomba Serikali Kuwajengea Daraja

Imetumwa: October 5th, 2021

Mbunge wa Jimbo la Hai Saashisha Mafuwe ameiomba serikali kupitia Waziri wa ujenzi na uchukuzi kutengeneza daraja lililokuwa likitumiwa na wananchi hao linalounganisha kata ya Weruweru na kata ya Mnadani  kutokana na daraja hilo kusombwa na mafuriko msimu wa mvua uliopita .

Maombi hayo yamekuja baada ya wananchi wa Kata hiyo kumweleza Mbunge kuwa wanapita juu ya kivuko cha treni baada ya daraja lililokuwa likiunganisha kata hizo kusombwa na mafuriko.

Saashisha amesema kuwa daraja hilo la Kata ya Weruweru ambalo lipo Kijiji cha kikavu chini lilikua daraja tegemezi kwa wananchi wa eneo hilo lakini baada ya mafuriko hayo  wananchi wamekosa  mawasiliano ya daraja inayowasaidia kufikia  huduma za kijamii ikiwemo afya na  elimu.

"Serikali ya awamu ya sita inayoongozwa na Rais Samia Suluhu Hassani imedhamiria kuzuia vifo  vya Mama na mtoto lakini kutokana na ukosefu wa daraja hili , baadhi ya wakina Mama wanajifungulia katika kivuko hicho cha reli na wakati mwingine watoto kupoteza maisha hivyo ni wakati wa serikali kuangalia kwa jicho la pekee namna ya kurejesha daraja hilo  kwa haraka." alisema Mafuwe.

Kwa upande wake Diwani wa kata ya Weruweru Abdala Chiwili amemshukuru Mbunge kwa kufika katika eneo hilo na kujionea hali halisi  na kusema  kuwa daraja hilo ni kilio kutokana na umuhimu wake kwani kivuko cha reli wanachotumia ni hatari kwa maisha yao  kwani treni inapita mara kwa mara.