DC Avunja Mabaraza ya Kata

Imetumwa: March 15th, 2019

MKUU wa wilaya ya Hai mkoani Kilimanjaro, Lengai Ole Sabaya ameagiza kuvunjwa kwa mabaraza ya ardhi ya kata tatu kutokana na kulalamikiwa na wananchi kuhujumu haki za wananchi katika kumiliki ardhi.

Mabaraza ya kata  aliyoagiza kuvunjwa ndani ya saa 24 ni Machame Magharibi, Bomang'ombe  na Bonden  pamoja kamati za ardhi  vijiji  vya Mkalama , Kawaya na Rundugai.

Akizungumza katika mkutano wa siku mbili wa kusikiliza kero, migogoro  na malalamiko ya ardhi ya  wananchi wa kata 17 za wilaya hiyo.

Hadi kufikia jana alikukuwa amepokea malalamiko, migogoro na kero 266 ambazo ni kusogeza mipaka, urasimishaji makazi, fidia ya ardhi  na zoezi la uwekaji alama za mipaka.

"Nakuagiza mwanasheria wa halmashauri (Henglibert Boniface) kwa kushauriana na mkurugenzi wako mtendaji ikifika kesho mniletee taarifa kuwa mmeshavunja mabaraza hayo" amesema Sabaya.

"Mabaraza haya yamekuwa yakituhumiwa kushirikiana na baadhi ya watu wenye uwezo kuhujumu haki za wananchi wanyonge kumiliki ardhi yao kwa kujali maslahi yao" alisisitiza.

"Pia nawaagiza kila kata kuitisha vikao vya maendeleo ya kata (WDC) kabla ya Machi 22 kujadili kero za ardhi kabla sijaja huko kwenye kata zenu" aliongeza Sabaya.

Kwa upande wake Mwanasheria wa halmashauri hiyo, Henglibert Boniface mesema kwa mujibu wa sheria za serikali za mitaa, (mamlaka ya wilaya) ya mwaka 1982, kifungu 23 zinampa mamlaka Mkurugenzi Mtendaji wa Halmashauri kupitia mwanasheria mamlaka ya kulivunja, kulisimamisha au kuagiza marekebisho katika mabaraza hayo.