Halmashauri ya Hai Yapata Hati Safi

Imetumwa: June 26th, 2018

HALMASHAURI ya  Wilaya ya Hai mkoani Kilimanjaro  imefanikiwa kupata hati safi kutokana na utendaji wake wa ukusanyaji mapato  kwenye vyanzo vyake vya ndani  katika kipindi cha mwaka 2016-2017.

Hayo yamebainishwa na Mwenyekiti wa Halmashauri hiyo, Helga Mchomvu katika kikao  cha Baraza la Madiwani kilichofanyika kwenye ukumbi wa halmashauri ambapo amesema kuwa Halmashauri  imepata hati safi kutokana na watendaji wake na madiwani kufanya kazi kwa ushirikiano katika suala zima la kuhakikisha mapato yanakusanywa kwa kiwango kinachotakiwa.

Aidha amewataka watumishi kufuata misingi imara itakayowawezesha kudhibiti mapato na matumizi ya Halmashauri kwa kuondoa mapungufu yaliyojitokeza katika kipindi cha nyuma kama kuchelewa kuwasilisha mahesabu kwa mdhibiti na mkaguzi mkuu wa hesabu za serikali(CAG) , kuchelewa kuwasilisha taarifa za matumizi  bila ya kuwa na viambatanishi vya malipo.

Mchomvu amesema kuwa kupatikana  kwa hati safi katika Halmashauri hiyo kutachochea zaidi kasi ya utendaji kazi ili kuweza kufikia malengo yaliyokusudiwa na  kuwashauri  madiwani  kutekeleza majukumu yao kwa ufanisi ili kuweza kudhibiti mapato na matumizi ya Halmashuari na kuweza kufanya vizuri  zaidi.

Hata hivyo Mwenyekiti huyo  amewahimiza madiwani kufanya kazi kwa ushirikiano na kuepuka kufanya kazi kwa mazoea na kuwataka kuwatendea haki wananchi ambao wamewachagua kwa kuhakikisha maendeleo yanawafikia wananchi pamoja na kutatua kero zinazowakabili.

Katika hatua nyingine madiwani wamekubaliana kuendelea kutumika kwa soko la walaji la Bomangombe kama ilivyokuwa likitumika wakati utaratibu wa kuanzishwa kwa soko la Gezaulole ukiendelea.