Mkuu wa Wilaya Hai Awanunulia Gari CCM Wilaya

Imetumwa: May 15th, 2019

MKUU wilaya ya Hai, Lengai Ole Sabaya amekabidhi gari aina ya Toyota Double Cabin kwa Chama cha Mapinduzi katika wilaya hiyo ili kurahisisha kazi za kiutendaji pamoja na kuwezesha chama hicho kuwafikia wananchi kiurahisi.

Akikabidhi gari hilo kwa viongozi wa CCM mkoa wa Kilimanjaro Ole Sabaya amesema gari hilo limenunuliwa mnadani kwa shilingi milioni 15  akishirikiana na wadau mbalimbali waliopo serikalini ikiwa ni shukrani kwa chama hicho kutokana kazi nzuri inayofanywa  ya kuwahudumia wananchi.

Akipokea gari hilo, Mwenyekiti wa CCM Mkoa wa Kilimanjaro Patrick Boisafi amesema kuwa mkuu huyo wa wilaya ameonesha uzalendo wa kutosha kwa chama na kuhimiza kuwa kwa sasa upinzani umekwisha na umebaki ndani ya chama.

Kwa upande wake Katibu wa CCM Mkoa wa Kilimanjaro, Jonathani Mabihya amewataka viongozi wa CCM wilaya ya Hai kusimamia matumizi ya gari hilo ili kuleta manufaa yaliyolengwa.

Kwa upande wake Mwenyekiti wa CCM wilaya ya Hai, Wanguba Maganda amemshukuru Mkuu wa Wilaya na kuahidi kulitunza gari hilo pamoja na kulitumia kwa matumizi yaliyokusudiwa.