Mkuu Wa Wilaya Ya Hai Aongoza Zoezi la Upandaji Miti Chemka

Imetumwa: May 24th, 2024

Mkuu wa wilaya ya Hai Amiri Mkalipa amewataka wananchi  wa kijiji cha chemka pamoja na  wafanyabiashara  wa eneo la utalii chemka  kata ya Masama Rundugai kuwa na utamaduni wa kupanda miti majumbani mwao pamoja na sehemu zao za biashara kwani jambo la kutunza mazingira ni la kila mmoja na kwamba bila mazingira eneo la utalii chemka haliwezi kuwepo.

Mkalipa ameyasema hayo wakati akiongoza zoezi la upandaji  miti katika chemchem ya chemka ambapo ni eneo la utalii wa maji moto pamoja na chemchem ya Rashidi Kombo zoezi liloloshirikisha  wadau mbalimbali wa mazingira pamoja na wananchi wa eneo hilo.

Mkalipa amesema kuwa wanapanda miti kwa ajili ya kutunza mazingira na kwamba ni muendelezo wa maelekezo ya serikali kupitia ofisi ya makamu wa Rais wizara ya mazingira na muungano kwani kila wilaya ilitakiwa kupanda miti milioni moja laki tano kwa mwaka huu na kwa wilaya ya Hai wameshafikia lengo   hilo na wameendelea kupanda miti  maeneo mbalimbali hivyo ni vyema miti hiyo ikatunzwa ipasavyo.

Kwa Upande wake Kaimu mkurugenzi wa Bonde la mto Pangani Patris Otieno  ambao ndio waratibu wa zoezi hilo la upandaji miti  kwa kushirikiana na ofisi ya mkuu wa wilaya ya Hai,Ofisi ya mkurugenzi pamoja na wakala wa huduma za misitu Tanzania (TFS) amesema kuwa katika kuendeleza kampeni ya utunzaji na upandaji wa miti kando kando ya mito, chemchem, na maeneo oevu  wamepanda jumla ya miti mia sita  na lengo ikiwa ni kuendelea kuihifadhi vyanzo vya maji katika maeneo ya Bonde  ikiwa  ni zoezi endelevu na kwamba  tayari wameshapanda miti ipatayo milioni moja na laki tano kwa wilaya ya Hai lakini lengo lao ni kuendelea kupanda miti elfu tatu katika kipindi hiki.

Amesema kuwa swala la uhifadhi wanafanya kwa kushirikiana na wadau  wa mazingira wakiwemo wananchi wanaozunguka  maeneo hayo,taasisi mbalimbali za kiserikali na zisizo za kiserikali na kwamba wanatoa elimu ili watu waweze kujua jinsi ya kuhifadhi maeneo ya vyanzo  na kuhakiksha kwamba hakuna shughuli zozote za kibinadamu zinazofanyika katika maeneo hayo.

Nae mtaalamu wa misitu kutoka ofisi ya maliasili halmashauri ya wilaya ya Hai John Katikiro  amesema kuwa wamekuwa wakitumia mbinu mbalimbali kutunza na kufuatilia miti inayopandwa katika maeneo ya wilaya ya Hai na kwamba wamekuwa wakiwachukulia hatua wale wote wanaobainika kufanya uharibifu wa mazingira.

Nao wananchi na wafanyabiasha katika chemchem ya Chemka wamesema kuwa wamefurahishwa na zoezi hilo la upandaji miti na kuhaidi kutunza miti hiyo kwani miti ni sehemu yao na kwamba kupitia miti hiyo wanapata fursa ya kufanya biashara kutokana na watalii kwenda kwa wingi katika chemchem hiyo.