Mkuu Wa Wilaya Ya Hai Awataka Wakandarasi Kukamilisha Miradi Kwa Wakati

Imetumwa: December 29th, 2022

SERIKALI Wilayani Hai mkoani Kilimanjaro imewataka wakandarasi wa barabara kufanya  kazi kwa weledi  na kukamilisha ujenzi kwa wakati kwa mujibu wa mkataba  baina yao na Serikali ili thamani  ya fedha  iweze kuonekana

Mkuu wa Wilaya ya Hai ,Juma Irando  alitoa Agizo  wakati wa ziara yake ya kukagua miradi ya matengenezo ya barabara  kwa mwaka fedha  2022/2023 inayosimamiwa na wakala wa barabara za Mijini na Vijijini  (TARURA)ngazi ya wilaya  hiyo.

Alisema wakandarasi wanawajibu mkubwa wa kutekeleza  miradi kwa kiwango kinachostahili na kukamilisha kwa wakati  ili jamii iweze kupata huduma  stahiki na kuondokana na adha za miundo mbinu  mibovu ya barabara .

Awali akitoa taarifa  ya utekelezaji wa TARURA wilayani Hai,Kaimu  Meneja  Mhandisi Musa Sumbwe alisema kwa mwaka wa 2022/2023 wanatekeleza mikataba sita ya matengenezo ya barabara  yenye thamani ya zaidi ya Shilingi  bilioni 4.8.

Sumbwe alisema kati ya miradi  hiyo upo mradi  wa matengenezo wa barabara  kwa kiwango cha lami ya Makoa Darajani- TaCRI-Mferejini unaotarajiwa kutumia zaidi ya bil 2.9 ambao  unatekelezwa na Serikali  kupitia fedha za maendeleo za tozo ya mafuta

Alifafanua kuwa kwa sasa kazi inayoendelea ni kupasua miamba ambapo ujenzi wa barabara  hiyo unatekelezwa na mkandarasi Builders and Limeworks Ltd unaotarajiwa  kukamilika April  25 mwaka 2024.