Ujenzi Wa Shule Ya Sekondari Kata Ya Mnadani Kuondoa Adha Ya Wanafunzi Kutembea Umbali Mrefu

Imetumwa: March 10th, 2022

Wananchi wa kata ya  Mnadani Wilayani Hai  wameipongeza serikali kwa kutoa fedha shilingi Millioni  470  kwa ajili ya ujenzi wa  shule mpya ya sekondari ya Shirimatunda

Waliyasema hayo wakati wakishiriki kuchimba msingi kwa ajili ya ujenzi wa vyumba  vya madarasa shuleni hapo wakishirikiana na wajumbe wa kamati ya ulinzi na usalama wa wilaya hiyo  ikiwa ni hatua ya kuunga mkono juhudi za serikali, ambapo walisema mpango wa serikali kutoa fedha hizo umelenga kuwawezesha watoto kusoma katika mazingira rafiki.

Diwani wa kata ya Mnadani  Nasib Mndeme aliwapongeza wananchi wa kata hiyo kwa kujitokeza ambapo amewaomba kuendelea na ushirikiano ili kuipeleka haraka shughuli hiyo  ya ujenzi wa vyumba vya madarasa

Mndeme  ameihakikishia serikali kuwa pesa hiyo waliyopatiwa kwa ajili ya ujenzi wa madarasa ataisimamia vizuri ili malengo yaliyokusudiwa yaweze  kukamilika kikamilifu

Kwa upande wake  Magreth Matiliya kutoka kijiji cha  Shirimatunda ,amesema Ukosefu wa shule ya sekondari katika kata hiyo imekuwa changamoto kwa wanafunzi wa kata hiyo hali inayowalazimu wanafunzi kutembea umbali wa kilomita 8 hadi  sekondari ya Mailisita huku wengine wakilazimika kwenda kata ya  Weruweru  kwa ajili ya masomo.

Alex Utaro, ni miongoni mwa wakazi wa kata hiyo  amesema kuwa wanafunzi wote wanaochaguliwa kujiunga na sekondari katika kata hiyo wanalazimika kuondoka saa kumi alfajir kwenda kata jirani ambapo kuna shule ya sekondari jambo ambalo ni hatari kwa usalama wao.

Mkurugenzi wa  Halmashauri ya Wilaya ya Hai, Dionis Myinga  alisema halmashauri hiyo imepokea fedha kutoka serikali kuu chini ya mpango wa maendeleo kwa ustawi wa taifa na UVIKO 19 ,ambazo zimelenga kuwezesha wanafunzi wote wa kidato cha kwanza kwa mwaka wa masomo 2022 kujiunga na kidato cha kwanza kwa wakati mmoja,badala ya awamu mbili.

Edmund Rutaraka  ambae pia ni Mwenyekiti wa Halmashauri ya Hai amesema ujenzi wa shule ya sekondari Shirimatunda umegharimu  nguvu za wananchi na Serikali  ambapo aliwaomba wananchi kuendela kuchangia mali na nguvu zao kwenye miradi ya maendeleo.

Hata hivyo mkuu wa Wilaya hiyo , Juma Irando  aliwaomba wananchi kuwa tayari kuchangia miradi ya maendeleo wakati miradi inapo anzishwa ili kuondoa changamoto zinazo wakabili wananchi  na kuondokana  na kutembea umbali mrefu kufuata  elimu kata ya jirani pamoja na huduma za afya

Kata ya mnadani ina shule moja ya sekondari na Shule  kumi za Msingi ambapo kati ya hizo  sita ni za serikali na nne zinamilikiwa na taasisi za watu binafsi.