Vijana 4500 Kunufaika Na Mradi wa Vijana

Imetumwa: August 28th, 2023

Zaidi ya vijana 4500 wa wilaya ya Hai wanatarajiwa kunufaika na mradi wa Vijana (Enhancing Livelihood Prospects for Young People) utakaotekelezwa katika wilaya nne mkoani Kilimanjaro ikiwemo wilaya ya Hai.

Akizungumza wakati wa utambulisho wa mradi huo Winnie Muine ambaye ni Meneja wa Mradi Kutoka DSW amesema mradi huo utakaohusisha wadau watatu HRNS Tanzania, Khune Foundation, DSW Tanzania umelenga   kuwawezesha Vijana kuboresha maisha yao katika maeneo ya Afya, Elimu, kipato pamoja na ustawi wao kwa ujumla ili waweze kufikia malengo yao.

Ameendelea kwa kusema mradi huo unatekelezwa katika Mikoa  minne ukiwemo mkoa wa Kilimanjaro, Arusha, Mbeya na Songwe  kwa muda wa miaka minne ( 2023-2027)  unaotarajiwa kunufaisha vijana takribani 50,000 ambapo kwa Mkoa wa Kilimanjaro utatekelezwa katika wilaya ya Rombo, Siha, Moshi vijijini pamoja na Hai.

Akizungumza katika zoezi hilo la utambulisho wa mradi huo Afisa Rasilimali watu  Mkoa wa Kilimanjaro ndugu Amos Machilika  amewataka  wadau kuendelea  kufanya kazi  karibu na  serikali katika kuhakikisha wanajua  vipaumbele vya serikali hususani katika Mkoa wa Kilimanjaro pamoja na fursa zilizopo serikalini.

Katika utekelezaji wa mradi huo kila shirika lina jukumu lake ambapo HRNS Tanzania watajikita zaidi na masuala ya kuwawezesha vijana wa kike na kiume katika Sekta ya Kilimo, Khune Foundation watajikita zaidi katika kutoa fursa za Elimu ya Juu na Vyuo vya ufundi katika maeneo ya uratibu, usafirishaji, na ugavi na DSW Tanzania watajikita katika Elimu ya Stadi za Maisha, Kupinga Ukatili wa Kijinsia na Elimu ya Afya ya Uzazi pamoja na utumiaji na upatikanaji wa Huduma Rafiki kwa Vijana.