Viongozi Wa Vijiji Waagizwa Kutunza Miti Inayopandwa

Imetumwa: December 8th, 2022

SERIKALI wilaya ya Hai, mkoani Kilimanjaro, imegiza viongozi wa vijiji pamoja na wananchi kuhakikisha kuwa wanatunza miti inayooteshwa ili kuboresha mazingira pamoja na kukabiliana na ukame katika maeneo  mbalimbali.

Agizo hilo limetolewa kwa nyakati tofauti na Katibu tawala wa wilaya ya Hai,Upendo Wella kwa niaba ya mkuu wa Wilaya Juma Irando,  katika zoezi la upandaji miti kwenye wiki ya  maadhimisho ya miaka 61  ya Uhuru  Tanganyika.

Amesema kuwa zoezi la kupanda miti limekuwa likifanywa kila mara la jamii imekuwa ikipanda kwa ajili ya maadhimisho na kusahau jukumu la kuitunza jambo ambalo limesababisha kuendelea kuwa na mazingira  ya ukame.

Amesema kuwa kutokana na wananchi kupanda miti pasipo kuitunza kunafanya nchi kuendelea kuwa jangwa pamoja na kusababisha  vyanzo vya maji kukauka na mazingira ya maeneo ya makazi kutokuwa  bora.

Amefafanua   kuwa miti iliyooteshwa inatunzwa na  haikatwi hovyo, na kwambi hatua kali zitachukuliwa kwa  yeyote atakaye kata miti hovyo pasipo kuzingatia kanuni na taratibu zilizowekwa na Serikali

Kwa upande wake Afisa Maliasili Wilaya ya Hai, Mbayani Mollel amewakumbusha viongozi wa vijiji kitunza na kuilinda miti iliyooteshwa ambayo itasaidia   kutunza mazingira kwa faida ya kizazi cha sasa na cha baadaye huku akiahidi kuwapa ushirikiano pale watakapohitaji msaada wa kitaalamu katika utunzaji wa mazingira.

Maadhimisho  ya miaka 61 wilaya  Hai yamefanyika kwa kufanya  shughuli  mbalimbali ikiwemo  kufanya usafi ,kuotesha miti 300 kwenye  Vituo vya Afya vya Chekimaji na Longoi .