Viongozi Watakiwa Kutoa Ushirikiano Katika Utekelezaji Wa Anwani Za Makazi

Imetumwa: March 21st, 2022

Madiwani  pamoja na watendaji wa kata na vijiji Halmashauri ya wilaya ya Hai wametakiwa kuendelea kutoa ushirikiano ili kuwezesha  utekelezaji wa zoezi la anwani za makazi kwenye maeneo yao ili zoezi hilo likamilike kwa wakati kulingana na mpango wa serikali.

Hayo yamesemwa Marchi 21 2022 na Mwenyekiti wa Halmashauri ya Wilaya ya Hai Edmund Rutaraka wakati akizungumza katika kikao kilichowakutanisha madiwani pamoja na watendaji wa kata na vijiji lengo likiwa ni kujadili mwenendo wa zoezi la uandikishaji wa anwani za makazi ambalo linaendelea ndani ya wilaya ya Hai.

Katika kikao hicho mwenyekiti wa Halmashauri amemtaka Kaimu mkurugenzi kufanyia kazi changamoto mbalimbali zilizoibuliwa na madiwani wakati wa kikao hicho ikiwemo suala la malipo kwa wenyeviti wa vitongoji ambao ndio wanaosimamia kwa ukaribu suala hilo.

Kwa upande wake Kaimu mkurugenzi wa Halmashauri ya Wilaya ya Hai Rajabu Yateri amesema wao kama Halmashauri wamezipokea  changamoto mbalimbali ambazo zimebainishwa na madiwani hao na kuahidi kuzifanyia kazi ili kufanikisha utekelezaji wa zoezi hilo kwa ufanisi.

Miongoni mwa hoja zilizoibuliwa na madiwani katika kikao hicho ni pamoja na kutaka kuwepo kwa vitambulisho kwa wale wanaofanya zoezi hilo la uandikishaji ili waweze kutambulika na kupata ushirikiano wanapofika sehemu husika.

Zoezi la uandikishaji wa anwani za makazi kwa Halmashauri ya Wilaya ya Hai limeanza kutekelezwa marchi 18 2022 na linatarajiwa kukamilika Aprili 1, 2022.