Wananchi Mbatakero Wapewa Majiko Banifu Kutunza Mazingira

Imetumwa: April 1st, 2020

Halmshauri ya Wilaya ya Hai imetoa majiko banifu yanayohamishika 19 kwa wananchi wa kijiji  cha Mbatakero  ili kuhakikisha kuwa serikali inakabiliana na uharibifu wa mazingira.

Majiko hayo yametokana na utekelezaji wa mradi wa matumizi endelevu ya ardhi (SLM)  na yamekabidhiwa leo  na mratibu wa Mradi huo wilayani Hai  Bw.Zephania Gunda ambapo amesema majiko hayo yanatokana na utekelezaji wa mradi huo kati ya mwaka 2011 na 2014 kwa mkoa wa Kilimanjaro.

“lengo kubwa ni kubana matumizi ya kuni kwahiyo tutaokoa misitu yetu kwasababu mtu atatumia kuni mbili hadi tatu kuivisha chakula chake na kutunza mazingira kwa kubana matumizi ya kuni.” amesema Gunda

Amesema kutokana na wananchi hao kuishi katika maeneo yenye ukame kwa muda mwingi majiko hayo yatawaepusha kutokukata miti kwa wingi kutokana na majiko hayo kutumia kiwango kidogo cha kuni.

Kwa upande wao baadhi ya wananchi waliyonufaika na mradi huo Bw Ibrahimu Juma Bi Juliana Mushi wamesema kutokana na kutumia nishati ya kuni kupikia kwa muda mrefu kumesababisha maeneo yanayowazunguka kutokea uharibifu wa mazingira kutokana na ukataji mwingi wa miti na hivyo hivi sasa wanaamini ukataji wa miti kiholela uatapungua.