Wananchi Wahamasishwa Kujiandikisha Katika Orodha ya Wapiga Kura

Imetumwa: October 16th, 2019

Mkurugenzi Mtendaji wa Halmashauri ya Wilaya ya Hai mkoani Kilimanjaro Yohana Sintoo amewataka wananchi wa wilaya hiyo na watanzania kwa ujumla kujitokeza kwa wingi kwenda kujiandikisha katika Orodha ya Wapiga Kura  kwa ajili ya Uchaguzi wa Serikali za Mitaa utakaofanyika Novemba 24 mwaka huu.

Sintoo   ametoa wito huo leo wakati alipokuwa akiwahamasisha wananchi  na wafanyabiashara katika soko la walaji Bomangombe kujiandikisha  ikiwa imebaki siku moja tu ya kujiandikisha.

Amesema maendeleo  ya nchi yanaanzia ngazi ya vitongoji, vijiji, kata, wilaya hadi Taifa hivyo tiketi ya kuweza kuchagua kiongozi mwenye sifa nilazima kwenda kujiandikisha ili kumchagua kiongozi anayefaa.

” Bila ya kujiandikisha haitawezekana kumchagua kiongozi mnayemtaka hivyo wito wangu kwenu kwa hii siku moja iliyobaki kwa ajili ya kujiandikisha jitokezeni kwa wingi  vinginevyo mtapoteza haki yenu ya kumchagua kiongozi mnayemtaka” amesema Sintoo.

Amewataka wananchi hao kujitokeza kujiandikisha bila kujali itikadi ya vyama vyao  kwani maendeleo hayana chama yapo kwa ajili ya watu wote.