Wilaya ya Hai Yatoa Mkopo wa Milioni 84

Imetumwa: June 14th, 2019

Katika kutekeleza agizo la kisheria la kila Halmashauri nchini kutenga asilimia 10 ya mapato yake ya ndani kwaajili ya kuwawezesha wanawake, vijana na walemavu, wilaya ya Hai imetoa Zaidi ya Shilingi million 84 kwa vikundi 16  vya wanawake, vijana na walemavu ikiwa kama mkopo kwa lengo la jamii hiyo kupiga hatua katika kujikwamuwa kiuchumi na kuchochea ukuaji wa pato la taifa.

Akikabidhi hundi ya fedha hizo hii leo katika ukumbi wa maktaba Mkurugenzi Mtendaji wa Halmashauri ya Wilaya Ya Hai Yohana Sintoo amesema kuwa usimamizi mzuri wa ukusanyaji wa mapato umechangia kwa kiasi kikubwa upatikanaji wa fedha hizo.

Amesema kuwa wanakikundi wanaopata mikopo hiyo watambue kuwa imeshatengenezewa sheria na kanuni zake hivyo Halmashauri ya wilaya ya Hai kupitia utoaji wa mikopo hiyo tayari inatekeleza sehemu yake ya sheria hiyo.

Aidha amewataka wanavikundi hao kwenda kuwekeza kwenye miradi yenye tija hasa kupitia elimu waliyopatiwa juu ya matumizi sahihi ya mikopo hiyo.

Kwa upande wake Katibu Tawala Wilaya ya Hai Upendo Wella amewataka kutumia fedha hizo kwa malengo sahihi ili kuleta maedeleo kwenye jamii zao na kwa uchumi wa Taifa kama lilivyo lengo la serikali.

Nao baadhi ya wanavikundi hao wameipongeza serikali wilayani Hai kwa kuwaamini na kuwapa fedha hizo na kuahidi kwamba zitaenda kuzalisha na kwamba watarudisha kwa wakati.

Halmashauri ya Wilaya ya Hai imetoa mikopo hiyo kutokana na asilimia kumi ya makusanyo ya mapato ya ndani ambapo 4% kwa ajili ya wanawake, 4% kwa vijana na 2% kwa watu wenye ulemavu.