Zaidi ya Watoto 44000 Kupatiwa Chanjo Wilayani Hai

Imetumwa: October 17th, 2019

Zaidi  ya watoto  elfu 44000  wanatarajiwa kupatiwa chanjo ya Surua - Rubella na polio katika wilaya ya Hai mkoani Kilimanjaro katika zoezi lililoanza leo na linarajiwa kukamilika Oktoba 21 mwaka huu.

Mratibu wa chanjo wa wilaya ya Hai, Michael Ndowa, ameyasema hayo leo katika ufungunzi wa zoezi hilo  lilofanywa na Mkuu wa Wilaya ya Hai, Lengai Ole Sabaya katika hospitali ya wilaya .

Ndowa amesema zaidi ya watoto 28,000 wenye umri kuanzia miezi tisa hadi miaka minne na miezi kumi na moja watapatiwa chanjo ya surua rubella huku watoto zaidi ya 16,000 wenye umri wa mwaka mmoja na nusu hadi miaka mitatu na nusu watapatiwa chanjo ya polio.

“Maandalizi yamekamilika na zoezi limeanza rasmi leo sehemu mbalimbali za wilaya lengo  likiwa ni kuhakikisha kuwa watoto wanapata chanjo na kukabiliana na magonjwa yanayosababishwa na kutokupata chanjo hizo”.amesema Ndowa

Akizungumza katika ufunguzi huo, Mkuu wa Wilaya ya Hai Ole Sabaya amewataka watumishi wote kushirikiana na Idara ya Afya kuhamasisha wazazi na walezi wenye watoto kuhakikisha kila mtoto wenye umri unaostahili anapatiwa chanjo stahiki

“Serikali imegharamia gharama zote za chanjo hii na ndio maana inatolewa bure kwa watoto na hatuwezi kupoteza mtoto kwa kupooza kwa kukosa chanjo , hivyo ninyi wazazi na walezi miliofika hapa muhamasishe wengine wote washiriki kikamilifu katika zoezi hili”amesisitiza Mkuu wa wilaya